Luke 15
Iesu viten tatavolien usil sipsip koa vuol vatie lat mukave Ahi ien vat vahotin koakeil avuol en tisaen keke avahi meatin keil onen a
1En avong tai, meatin keil ten takis ka meatin tisa sav keil emun umai ven Iesu keke avalong hihiseien keil onen. 2Ka navong Farasi keil ka tiser keil ten Mengkatien keil onen Mosis alesi, asel kutut kati avit, “Meatin ekek mul vise meatin tisa keil en tua ka mul kanian emun ral min keil.”3Ka Iesu viten tatavolien koanek min keil vit, 4“?Vahit tai en kami, sipsip osen vi handred tai (100) ka tai en keil vuol, kei houmon sa? Kei helokovein sipsip teisav keil osen il ian oumunae en mesai, ka heha helekat tai koa vuol heha vio ... hehotini. 5Ka navong votini, kei hesi kei hehi houlu, hehousi en vatisin, ka heha ris teim. 6Ka navong rokol teim osen, hehise tunali keil ka koakeil aro vesesal veni avamai, ka hehiteni min keil hehit, “!Rehesi ir veni navotin sipsip osak koa vuol!” 7Naviteni min kami, koakeil en out nesa amul asi keil houlu mok navong meatin tai koa vuol en tisaen viles moulien onen keke vousil Ahi, mulin meatin houlu koa avit amal tuai ka asakras avahiles.”
Iesu viten tatavolien usil mane koa vuol vatie lat mukave Ahi ien vat vahotin koakeil avuol en tisaen keke avahi meatin keil onen
8Ka Iesu viten tatavolien tamun vit, “Vahit ahin tai ling revi mane halualim (10) onen, ka evus, lesi keke tai en keil vuol. ?Kei houmon sa? Henit laet tai, heteas en out neim, ka helekaek en mane koa vuol en out vasi heha vio.... hehotini. 9Ka navong votini, kei hehise tunahin keil ka koakeil aro vesesal veni avamai. Ka hehiteni min keil hehit, '!Rehesi ir veni navotin mane onak koa vuol!' 10Naviteni min kami, angelo keil onen Ahi, avasi keil houlu mok navong meatin tai koa vuol en tisaen viles moulien onen keke vousili.”Iesu viten tatavolien tai usil natnali elu koa luvuol vatie lat mukave Ahi ien vat vahotin koakeil avuol en tisaen keke avahi meatin keil onen
11Iesu viten tatavolien tamun vit, “En out tai, meatin tai ro ral min natnali heite elu. 12En avong tai, koa tasite viteni min Tata onen vit, '!Tata, titi vas tounah keil onom ven komal. Hevus, kisan onak kosa!' Sakini tamealu riti vas tounah keil onen min keilu.13Avong teis muli, koa tasikor lah vasin tounah keil onen, ka mual va en out tai soutin. En out enek, kei purun mane vasi keil onen en moulien tai koa romal tei. 14Ka navong ehon enek vulhul vasin mane onen, out koa ro ien, ous romustei ka anien tovuol. Sakini, amai kati ka mai vi livere vareis. 15Sakini, kei va mum min meatin tai en out enek koa sila va vato vatal min vuas keil osen ka vahengan keil. 16En rendemien onen, kei ien vati van tei anien an vuas keil, ka meatin tovuol vasan anien mini vani. 17Evus, rendemien onen mae ris tahos ka kei viteni min kei sasen vit, 'Meatin toumien vasi keil onen tata onak, anien ae houlu. Ka inau, hervitei tuetin, nimat ven amai en out ekek. 18Nimea, niha ris niles tata onak. Ka navong nilesi, nihiteni mini nihit, “Tata, nakilea namum tisa en meten Ahi ka en metom. 19Narvinvintei mun kovahise nau en natmali. Kumoni minau hesuval navi meatin toumien tai onom.” ' 20Sakini, kei mea, va ris en teim sen tata onen.
“Ka navong kei mul veah soutin neli ran out teim, tata onen lesi. Navong lesi, tata onen ien mahisi ka mea muloh veni. Navong rokoli, kav kati ka musi en vivin. 21Ka natnali viteni mini tata onen vit, 'Tata, namumoni tisa en meten Ahi ka en metom. Narvinvintei kovahise inau en natmali.'
22“Ka tata onen vise slev keil onen umai ka viteni min keil vit, '!Mihekalah! Mihekur eisin tai koa tahos imok hemai ka mihesin en kei eni. Miheling ring en kalihen vatie lati keke vi natkuli kati. Ka mihesan sandel heheasi vatie lati rovitei mun livere. 23!Hevus, mihou vini titan buluk tai koa aven musising revi keke rovoumon mari anien, veni rosi ir houlu mok kosa! 24Veni natkuli emat, ka kosa, kei moul eris ran matien. Anatin, kei vuol, ka kosa, kei mai ris kistal minir.' Ka amusau ka uvol en sien.
25“Navong tounah keil enek mul kur out, ehon koa vi moeite onen mul en ah. Ka navong kei mul mai ris vesesal en out teim, kei longe keke meatin keil amul amusau ka uvol. 26Sakini, kei vise slev tai emai ka visi vit, '?Asa ke?'
27“Ka kei vit kesi mini vit, 'Tumali mai ris teim ka tata onom muas titan buluk tai koa aven musising revi veni lesi keke natnali moul veah ka mai ris venir.'
28“Ka navong ehon koa moeite longe mukok, tin tisa, ka ien rovatei vaha neim. Sakini tata onen mai hae ka peahi vaha neim vatal min keil. 29Ka moeite onen vit kesi min tamen vit, '!Kitaengon nau! !Sua houlu tuai namum minuk suval slev tai onom! !Inau narlong rastei rem! ?Ka asa suk kosani minau? !Tounah tovuol! Korsan etai nani koa havivis minau keke moumon etai anien vatal min timue keil onak. 30!Ka navong natmali ekek, koa purun tounah vasi keil onom en holaso keil, kistal eris en teim som, komea ka komuas titi buluk tetahos veni!'
31“Ka tata onen vit kesi mini vit, 'Natkuli ▼, en avong vasi keik koro ral minau, ka tounah vasi onak avi onom. 32Mal enges keke ir rovoumon anien ven tumali ka rovasi ir veni. Veni, mulamu, suval kei mat, ka, kosa, kei moul eris. Anatin, kei vuol, ka, kosa, ir rovotin risi.'”
Copyright information for
PMA